Deiseb Gwyliau ysgol byrrach ar gyfer plant ag anghenion ychwanegol

Gall plant nad oes ganddynt anghenion dysgu ychwanegol fynychu clybiau gwyliau mewn meithrinfeydd dydd. Fodd bynnag, nid yw’r rhan fwyaf o’r meithrinfeydd hyn yn darparu gwasanaethau ar gyfer plant ag ADY, a hynny yn sgil diffyg hyfforddiant neu leoedd, neu oherwydd y goblygiadau o ran costau staffio, gan y byddai angen iddynt fodloni cymhareb benodol o ran staff a phlant. Er enghraifft, yng Nghymru, y gymhareb staffio ar gyfer plant rhwng 3 a 7 oed yw un aelod o staff i bob wyth o blant. Ar gyfer plant rhwng 8 a 12 oed, y gymhareb yw un aelod o staff i bob deg o blant. Ni fyddai hyn yn bosibl i blentyn ag ADY, ac ni fyddai’n foesegol ychwaith. Mae angen mwy o drefn a strwythur ar blant ag ADY, ond yn ystod gwyliau’r ysgol, disgwylir iddynt addasu. Yn ogystal, beth am rieni sy'n gweithio? Nid oes modd iddynt gymryd chwe wythnos neu fwy i ffwrdd o’r gwaith. Felly, i ble y dylai eu plant hwy fynd? Os nad oes modd byrhau’r gwyliau, siawns y dylid darparu cyllid ychwanegol i sefydlu clybiau gwyliau ar gyfer plant ag ADY, yn union fel y ddarpariaeth sydd ar gael ar gyfer plant nad oes ganddynt ADY. Mae hon yn sefyllfa lle dylid ystyried cydraddoldeb a hawliau'r plentyn.