Deiseb Ymchwiliad i argaeledd meddyginiaeth ADHD yng Nghymru a datrys unrhyw broblemau cyflenwi
Ar gyfartaledd rwy'n ffonio dros 30 o wahanol fferyllfeydd mewn awdurdodau amrywiol i gael meddyginiaeth ADHD, ac nid fi yw’r unig un sy’n gorfod mynd drwy’r broses anodd hon bob tro y byddaf yn cael presgripsiwn newydd.
Dychmygwch aros am flynyddoedd i gael diagnosis a meddyginiaeth, ond wedyn clywed "allwn ni ddim cael eich meddyginiaeth". Mae eich corff yn dod i arfer â'ch meddyginiaeth ac mae ei chymryd i ffwrdd yn rhwystredig. Ni all fferyllfeydd archebu'r feddyginiaeth hon, rydym yn dibynnu ar stoc dros ben ac rydym yn clywed y dylem gymryd meddyginiaeth dim ond pan fydd angen.
Rhagor o fanylion
Mae timau iechyd meddwl y GIG yn dweud wrthym am gymryd ein meddyginiaeth dim ond pan fydd gwir angen. Mae'r taflenni meddyginiaeth a gwefannau'r GIG yn nodi na ddylech roi'r gorau i gymryd eich meddyginiaeth yn sydyn. Os nad ydym yn cymryd y feddyginiaeth fel y dylem, rydym yn dioddef pethau fel blinder, diffyg cwsg, hypersomnia, breuddwydion byw, iselder, a chur pen. Sut mae unrhyw un i fod i fyw a gweithio fel hyn?
Nid ydym yn cael cymorth gan wasanaethau iechyd meddwl y GIG, meddygon teulu na fferyllfeydd gan na allant wneud dim am y diffyg meddyginiaeth, gan fod hyn yn digwydd ar draws y DU.
Ni ellir disgwyl i ni barhau fel hyn heb gynnig unrhyw opsiynau eraill. Mae'n achosi mwy o bryder, straen, iselder ac absenoldeb o'r gwaith, ac mae’n effeithio ar berthnasoedd teuluol/rhwydwaith.
Hoffem i Lywodraeth Cymru gydnabod bod yna broblem, bod pobl yn dioddef, ac nad yw hyn yn cael ei ddatrys. Rydym ni’n bwysig hefyd, felly rhowch flaenoriaeth i ni.
Ar ôl casglu 250 llofnod...
Caiff pob deiseb sydd â mwy na 250 llofnod ei chyfeirio at y Pwyllgor Deisebau
Ar ôl 10,000 llofnod...
Caiff deisebau sydd â mwy na 10,000 llofnod eu hystyried ar gyfer dadl yn y Senedd