Deiseb Cyflwyno Cyfraith Martha yng Nghymru i warantu hawl cleifion a theuluoedd i gael ail farn

Datgelodd marwolaeth Martha Mills yn Lloegr sut gellir anwybyddu pryderon teuluoedd nes ei bod yn rhy hwyr. Cafodd rhybuddion ei rhieni eu diystyru, a bu farw o salwch y gellid ei atal. Mewn ymateb, mae Llywodraeth y DU yn cyflwyno ‘Cyfraith Martha’ yn Lloegr, gan roi hawl gyfreithiol glir i gleifion a theuluoedd gael ail farn feddygol os nad yw pryderon yn cael eu datrys. Mae teuluoedd yng Nghymru yn haeddu'r un amddiffyniad. Nid yw methiannau o ran uwchgyfeirio, cyfathrebu a diagnosis amserol wedi'u cyfyngu i Loegr. Yng Nghymru hefyd, mae teuluoedd yn dweud eu bod nhw wedi cael eu diystyru, eu gadael yn y tywyllwch, neu eu gorfodi i ymladd i gael eu clywed tra bod bywydau yn y fantol. Byddai hawl gyson, wedi'i chefnogi'n gyfreithiol, i uwchgyfeirio materion ar draws holl genhedloedd y DU yn adfer ymddiriedaeth y cyhoedd yn y GIG, yn sicrhau tryloywder, ac yn achub bywydau. Rydym yn annog y Senedd i weithredu fel nad yw cleifion a theuluoedd yng Nghymru yn cael eu gadael ar ôl. Mae data rhyddid gwybodaeth yn dangos dros 1,000 o farwolaethau sy'n gysylltiedig â sepsis mewn un ysbyty ers 2018, sy’n tynnu sylw at yr angen brys am gyfraith Martha yng Nghymru.