Deiseb Mabwysiadu Cyfraith Benedict a’r canllawiau statudol diweddaraf mewn ysgolion.

Mae plant ag alergeddau difrifol sy’n mynd i leoliadau addysgol bob dydd mewn perygl o anaffylacsis — adwaith alergaidd cyflym sy'n peryglu bywyd a all ddigwydd o fewn munudau. Mae teuluoedd yn ymddiried yn llwyr yn y lleoliadau hyn i gadw eu plant yn ddiogel trwy hyfforddi staff yn briodol, rhoi polisïau clir ar waith ac ymateb yn effeithiol mewn argyfwng. Yn anffodus, nid yw hyn bob amser yn digwydd mewn ffordd gyson.

Mae Lloegr eisoes wedi gwella ymwybyddiaeth o alergeddau a disgwyliadau o ran diogelu. Mae gan Gymru gyfle i ddilyn yr un trywydd.

Nid yw'r canllawiau statudol presennol yng Nghymru ar reoli alergeddau a chyflyrau meddygol yn ddigon cadarn. Mae arferion yn amrywio rhwng awdurdodau lleol a lleoliadau addysgol, gan greu anghysondeb sy’n golygu bod rhai plant yn llai diogel, a bod llai o ddarpariaeth ar eu cyfer, na phlant eraill.
Mae’r mater hwn yn effeithio ar blant ag alergeddau, ond hefyd ar blant ag asthma, diabetes, epilepsi, clefydau hunanimíwn a chyflyrau iechyd hirdymor eraill. Mae’n rhaid i deuluoedd deimlo’n hyderus bod ysgolion yn ddiogel, yn wybodus, yn barod ac yn gynhwysol.