Deiseb Sicrhau bod gan blant ag alergeddau bwyd fynediad cyfartal i gymorth prydau ysgol am ddim

Mae rhaglen Llywodraeth Cymru i ddarparu prydau ysgol am ddim i holl blant ysgolion cynradd Cymru yn cefnogi teuluoedd gyda’u costau byw. Fodd bynnag, ni all rhai plant gael prydau ysgol yn ddiogel oherwydd alergeddau bwyd neu anghenion deietegol eraill y mae gofyn iddynt eu dilyn am resymau meddygol.
Mae gan fy mab alergedd i datws. Mae cynhwysion tatws yn cael eu defnyddio mewn llawer o fwydydd, ac mae hyn yn ei gwneud hi'n anodd i ysgolion a darparwyr arlwyo roi sicrwydd bod prydau bwyd yn ddiogel iddo. O ganlyniad, nid oes ganddo’r un hawl â phlant eraill i gael prydau ysgol am ddim.
Rhaid i deuluoedd yn y sefyllfa hon ddarparu pecynnau bwyd ar eu traul eu hunain, er gwaethaf y ffaith eu bod yn gymwys i gael yr un cymorth â disgyblion eraill. Cyflyrau meddygol yw alergeddau bwyd, nid dewisiadau ynghylch ffordd o fyw.
Gofynnwn i Lywodraeth Cymru adolygu'r mater hwn, casglu data ar blant yr effeithir arnynt, a darparu talebau bwyd neu gymorth ariannol cyfatebol lle na ellir darparu prydau ysgol addas yn ddiogel.