Deiseb Sefydlu cysylltiadau partneriaeth rhwng Llywodraeth Cymru a Chiwba a Venezuela

Mae gan Gymru draddodiad 40 mlynedd o ddatblygu cysylltiadau partneriaeth rhyngwladol ffurfiol, wedi’u hariannu gan y Llywodraeth a’u darparu drwy gynllun Dolen Cymru a rhaglen Cymru ac Affrica. Mae'r cysylltiad rhwng Cymru a Lesotho, a lansiwyd ym 1985, wedi arwain at leoli dros 50 o athrawon o Gymru yn Lesotho. Mae hefyd wedi cefnogi gweithgarwch partneriaeth a chyfnewid yn y GIG, ac wedi arwain at gydweithio diwylliannol ac addysgol rhwng y ddwy genedl. Mae partneriaeth debyg yn bodoli gydag Uganda.

Mae'r cysylltiadau hyn yn gweithredu o fewn cymhwysedd datganoledig Llywodraeth Cymru. Er bod cysylltiadau rhyngwladol fel arfer wedi'u cadw yn ôl gan Senedd y DU, mae gan Lywodraeth Cymru y pŵer i drefnu cytundebau partneriaeth nad ydynt yn rhwymol â Llywodraethau eraill mewn meysydd datganoledig, megis addysg, iechyd a diwylliant, ac i gynnal cyfarfodydd gyda chymheiriaid o genhedloedd eraill.

Mae'r ddeiseb hon yn gofyn i Lywodraeth Cymru ymestyn y model partneriaeth sefydledig, anwleidyddol hwn i Giwba a Venezuela, er mwyn meithrin cysylltiadau rhwng pobl mewn ardaloedd datganoledig, cyfnewid athrawon, a chydweithio ym meysydd iechyd a diwylliant, fel y mae eisoes yn ei wneud gyda Lesotho.