Deiseb Sicrhau cydymffurfiaeth orfodol â chanllaw NICE rhif 73, data cenedlaethol, a monitro arbenigol blynyddol ar gyfer gofal endometriosis

Yng Nghymru, mae angen system strwythuredig ac atebol ar gyfer gofal endometriosis, sy'n sicrhau bod pob claf yn cael ei reoli’n gyson, o dan arweiniad arbenigwyr. Dylid sicrhau bod rhaid i fyrddau iechyd ddilyn canllaw NICE rhif 73 yn llawn, gan gynnwys trefniadau archwilio ffurfiol, dyletswyddau adrodd, a chanlyniadau pan na chaiff canllawiau eu gweithredu. Mae creu cofrestrfa genedlaethol ar gyfer endometriosis yn hanfodol o ran cofnodi llwybrau diagnostig, cofnodi camau’r clefyd yn gywir, cofnodi’r baich o ran symptomau, cofnodi technegau llawfeddygol, cofnodi cymhlethdodau, cofnodi’r cyfnodau rhwng achosion o’r clefyd yn dychwelyd, cofnodi’r effaith ar ffrwythlondeb, a chofnodi datblygiad anabledd. Byddai'r data hyn yn caniatáu i Gymru olrhain canlyniadau, nodi amrywiadau rhanbarthol, a chynllunio gwasanaethau yn seiliedig ar dystiolaeth wirioneddol yn hytrach na rhagdybiaethau. Byddai cynnal adolygiadau arbenigol blynyddol gorfodol yn sicrhau asesiad parhaus o boen, yr effaith ar organau, effeithiolrwydd triniaeth, a'r risg o’r clefyd yn dychwelyd, gan atal menywod rhag cael eu gadael heb driniaeth ddilynol. Mae’r gofal a ddarperir ar hyn o bryd yn brin o strwythur, goruchwyliaeth, a chanlyniadau mesuradwy. Heb y diwygiadau hyn, nid oes modd i Gymru ddarparu gofal diogel a chyfartal, na deall gwir raddfa'r niwed a achosir gan oedi o ran cael diagnosis a monitro annigonol.